Жастарды білім жолына салып, түзу жолдан тайдырмай, санаға сәуле шашар оқу-білім тізгінін ұстату – мемлекет пен қоғамның міндеті. Қандай мемлекет болмасын жастардың, әсіресе, мектеп жасындағы оқушылардың білім деңгейіне ерекше жағдай жасайды. Қазақстанның келешек жанды келбеті саналатын оқушыларды үлкен өмірге даярлауда ел үкіметінің де атқарып отырған істері айтарлықтай жоғары дәрежеде. Білімнің іргетасы мықты болса, әрі қарай бастар жолы да даңғыл болмақ.

    «Не нәрсе талаптансаң табылады» дегенді Мәшһүр Жүсіп Көпеев бекер айтпаса керек. Атақты Жиренше шешен бес жастағы баласын «Азаматым» деп таныстырған. Біздің қазақ – ұланын ұлықтап, азаматын таныған халық. Өйткені, адамның қандай тұлға болып тұғырға шығатыны алдына қойған мұрат-мақсатынан белгілі болмақ.

Өмірде ең ұлы екі мақсат бар. Біріншісі, адам болу, екіншісі, маман болу. Белгілі бір деңгейдегі биікті бағындыру үшін, адамзат баласы осы екі мақсаттың жетегінде арманға құлаш ұру жетіп жатыр. Самғаған қыранның қанаты талмайды, егер де мақсаты айқын болса! Міне, көксегені мен діттегені бойына күш беретін өресі биік өрендеріміз мақтауға да, мақтануға да лайық.

    «Күш атасы – білімде» екенін таныған саналы жас өз жетістігін туған халқына, үміт артқан ата-анасына арнағысы келеді. Бойындағы бұла күші мен жігерін, қабілетін арманға, мүдделі мақсатқа қарай бағыттайды. Міне, арманға жетер жастың – осындай өмірлік позициясы айқын болуы шарт. Елдің келешегі өзіндей бүгінгі оқушы, ертеңгі жас, білікті маман болар өскелең ұрпақтың қолында екендігін жете түсінетіндігі анық.

    Республика көлемінде жұмыс жасайтын «EVEREST» баспа үйі жарыққа шығарғалы отырған «Ұлағатты ұрпақ» деп аталатын энциклопедиялық жинағымыз бүгіннен білім нәрімен сусындап, спортпен айналысып, өнерімен өрге жүзіп, көңілге қуаныш ұялатып жүрген ұлағатты ұл-қыздарымызға арналады.